УИХ дахь Ардчилсан намын бүлэг 2025 оны тавдугаар сарын 1-ний өдрийн үдээс өмнөх чуулганы нэгдсэн хуралдаанаас завсарлага авсан. Тус бүлгийн гишүүд өнөөдөр /2025.05.02/ мэдээлэл хийлээ. УИХ дахь Ардчилсан намын бүлгийн гишүүдийн байр суурийг хүргэе.

УИХ дахь АН-ын бүлгийн дарга О.Цогтгэрэл:

-Бид чуулганы нэгдсэн хуралдаанд суугаагүй ч ажлын байрандаа мэдээллүүдээ солилцоод л байж байна. УИХ-ын тухай хуулиар УИХ дахь намын бүлэг завсарлага авах эрхтэй. Завсарлага авахдаа ажил таслах биш, АН-ын бүлгийн гишүүд 10.00 цагт ирцээ өгөөд, гишүүд бүлгийн даргын өрөөнд гишүүд хуулийн төслийн талаар мэдээлэл өгөөд байж байна.

Бид хуулиар олгосон эрхийн хүрээнд ажиллаж байна. Завсарлага гэдэг нь УИХ-ын үйл ажиллагаа гацаах зорилгогүй. Тиймээс ирц бүрдүүлээд, ажлыг явуулах нөхцөл бүрдүүлсэн гэсэн үг. Цагаа бүртгүүлээд, АН-ынхан Төрийн ордноос гараагүй, ажлын байран дээрээ байна.

Энэ бол хоёр хүний харилцааны асуудал биш, засаглалын асуудал юм. Тэр тусмаа УИХ бол Монгол Улсын төрийн эрх барих дээд байгууллага. Төрийн эрх барих дээд байгууллагыг бусад засаглал нь үл тоож байгааг жишиг болгож явах уу. Үүнийг хүлцэн тэвчих нь нийгэмд буруу жишиг тогтооно гэж үзэж байна.

УИХ-ын гишүүн, Хүний эрхийн дэд хорооны дарга С.Эрдэнэболд:

-Өнөөдөр УИХ-ын чуулганы хуралдааны үеэр Их хурлын дарга Д.Амарбаясгалан мэдээлэл хийсэн. Ингэхдээ ард түмний амьдрал сайнгүй байгаа. Шийдэх асуудал их байгаа тухай хэлсэн. Бид үүнтэй санал нэг байна.

Ард түмний амьдрал сүүлийн таван жил ямар нөхцөлд байгаа, яагаад хэцүү байгаа тухай хэдэн тоо баримтыг хэлье. 2020, 2025 оны тавдугаар сарын 1-ний өдрийг харьцуулъя.

2020 онд талхны үнэ 1300 төгрөг байсан бол өнөөдөр 2640 төгрөг буюу 103.7 хувиар өссөн байна. Гурилын үнэ 2020 онд 2100 төгрөг байсан бол одоо 3000 төгрөг давж 40 гаруй хувиар өссөн байна. Төмс, луувангийн үнэ 1200-1550 байсан бол 1500-3788 төгрөг болсон.

Өнөөдөр парламент бодлого гаргаж, хэлэлцэх ёстой. Гэхдээ бодлого хэлэлцэх явцад бид суурь зарчмуудаа, парламент ёсныхоо дархлааг алдсаар байна.

Парламентын дарга ямар асуудал хэлсэн гэхээр, нэр бүхий гишүүд миний хэлсэн эдийн засгийн бодит байдлыг асуухад түүнд эгдүүцэж тодорхой хариултыг өгсөн. Энэ хариулт нь ёс зүйн хувьд уучлалт гуйх шаардлагатай гэдэг шаардлагыг АН-ын бүлэг гаргасан.

Ерөнхий сайдыг УИХ-аас уучлал гуйхыг шаардсан АН-ын бүлгийн шаардлага бол ерөөс популизм биш. Харин ч тогтолцоогоо хамгаалах гэсэн, гажуудал тогтчих вий гэсэн болгоомжлолоос бий болсон үйлдэл юм.

УИХ дахь АН-ын бүлгийн гишүүн Б.Жаргалан:

-УИХ дахь Ардчилсан намын бүлэг УИХ-ыг хамгаалах зорилгоор чуулганы хуралдаанд орохгүй байгаа. Ерөнхий сайд бол парламентад ажлаа тайлагнах ёстой гүйцэтгэх засаглалын тэргүүн.

Парламентыг басамжилж, үл хүндэтгэж засаглалын хямрал руу түлхэж болохгүй. Засаглал хоорондын асуудлыг хэт явцууруулж болохгүй. УИХ-ын удирдлага энэ байдлыг таслан зогсоож, парламентын дархлааг бэхжүүлэх тал дээр бидэнтэй хамт байна гэж найдаж байна.

Б.ЖАРГАЛ