Засгийн газрын дотоод үнэт цаасны анхдагч зах зээлийн арилжаа өчигдөр явагдаж, Өрийн удирдлагын тухай хуулийн 12.1.3-т заасан “Засгийн газрын дотоод үнэт цаасны зах зээлийг дэмжих” зориулалтын дагуу 6 сарын хугацаатай, 5 тэрбум төгрөгийн үнэт цаас, 2 жилийн хугацаатай, 5 тэрбум төгрөгийн үнэт цаасыг тус тус Монголын хөрөнгийн биржийн Засгийн газрын үнэт цаасны анхдагч арилжааны системээр дамжуулан арилжаалжээ.

Зарласан нийт дүнгээс 4.4 дахин их буюу 43.7 тэрбум төгрөгийн санал ирж, 6 сарын хугацаатай үнэт цаасны жигнэсэн дундаж хүү 9.466 хувь, 2 жилийн хугацаатай бондын жигнэсэн дундаж хүү 10.477 хувьтай арилжаалсан байна

Цаашид дотоод үнэт цаасны зах зээлийн хөгжлийг дэмжих, хөрөнгийн зах зээлд төгрөгийн бондын өгөөжийн муруйг тогтоох зорилгоор 2025 оны 2 дугаар улиралд хоёр долоо хоног тутамд богино болон дунд хугацаатай тус бүр 5 тэрбум төгрөгийн үнэт цаас гаргах аж.

Засгийн газар нийт 60 тэрбум төгрөгийн үнэт цаас арилжаалахаар төлөвлөжээ.

Өчигдөр буюу 2025.04.17-ны өдөр Засгийн газрын дотоод үнэт цаасны хоёрдогч зах зээлийн арилжаа доорх товч тэмдэглэгээтэйгээр эхэлжээ.

Б.ЖАРГАЛ