Европын Холбооны Гадаад харилцаа, аюулгүй байдлын бодлогын асуудал эрхэлсэн дээд төлөөлөгч Каяа Каллас АНУ-ыг Украинд гал зогсоохын төлөөх тэмцэлд байгаа арга, боломжоо ашиглахгүй байна гэж буруутгав.

Европын Холбооны дипломатын тэргүүн энэ сарын 22-ны мягмар гаригт AFP агентлагт ярилцлага өгөхдөө “АНУ-д Орост дарамт үзүүлэх боломж бүрэн бий. Харин тэд эдгээр боломжоо ашиглаагүй.

Иймээс Орос өөрийн “тоглоом”-ыг үргэлжлүүлэн тоглож, цаг хугацаа хожиж байгаа бөгөөд үнэндээ тэд энх тайвныг хүсэхгүй байна. Трамп энэ сарын 18-нд Орос, Украин хоёрыг хурдан эвлэрэхгүй бол зуучлалын хүчин чармайлтаа зогсооно гэж анхааруулсан.

ОХУ-ын ерөнхийлөгч Владимир Путины зарласан Улаан өндөгний баярын 30 цагийн гал зогсоох хэлэлцээр нь АНУ-ын ерөнхийлөгч Дональд Трампыг аргалах гэсэн башир арга байсан” гэж хэлжээ.

Мөн Европын Холбооны Гадаад харилцаа, аюулгүй байдлын бодлогын асуудал эрхэлсэн дээд төлөөлөгч “АНУ-ын засаг захиргааны гаргаж байгаа үйлдлийг ойлгохгүй байгаагаа илэрхийлж "Хэрэв тэд өөрт байгаа багаж, хэрэгслээ ашиглахгүйгээр цааш явах гэж байгаа бол миний гол асуулт бол яагаад.

Тэд яагаад энэ дайныг бодитоор дуусгахын тулд өөрт байгаа бодит боломжоо ашиглахгүй байгаа юм бэ?" гээд “Трамп Москватай энэ удаа хэлэлцээ хийхдээ урьдын адил тохиролцох оролдлого хийсээр байх болно гэж би эмээж байна” гэж мэдэгдэв.

Украины ерөнхийлөгч Владимир Зеленский энэ сарын 26-нд Ромд болох Ромын Пап лам Францискийг оршуулах ёслол дээр Трамптай уулзана гэдэгт найдаж байгаагаа илэрхийлж “Тийм ээ, би үүнийг хүсч байна, би бэлэн байна. Бид АНУ-ын түншүүдтэй уулзахад хэзээд бэлэн байна. Украин гал зогсоосны дараа Оростой ямар ч хэлбэрээр хэлэлцээ хийхэд бэлэн байна” гэж мэдэгдэв.

Мөн АНУ-ын ерөнхийлөгч Дональд Трамп "Орос, Украин хоёр энэ долоо хоногт тохиролцоонд хүрнэ гэдэгт найдаж байна” гэж мэдэгдсэн бөгөөд Цагаан ордны хэвлэлийн нарийн бичгийн дарга Каролин Левитт “АНУ-ын ерөнхийлөгчийн тусгай элч Стивен Виткофф энэ долоо хоногт ОХУ-д айлчилж, ОХУ-ын ерөнхийлөгч Владимир Путинтэй Орос-Украины мөргөлдөөнийг зохицуулах асуудлыг тохиролцох талаар дахин хэлэлцээ хийнэ” гэж мэдээлэв.

Бэлтгэсэн Г.АМАРСАНАА