Орос, Украины талууд “энэ долоо хоногт” гэрээ байгуулна гэдэгт найдаж байна гэж АНУ-ын Ерөнхийлөгч Дональд Трамп ням гарагт мэдэгдсэний сацуу хоёр талын тохиролцоонд ямар нөхцлүүд багтах талаар тодорхой дурдсангүй.

Тэрбээр “Truth Social” нийгмийн сүлжээний хаягтаа “Орос, Украин хоёр энэ долоо хоногт хэлэлцээр байгуулна хэмээн найдаж байна” гэж бүх үгийг том үсгээр бичсэн байна. Ингэснээр хоёр улс цэцэглэн хөгжиж буй Америкийн Нэгдсэн Улстай томоохон бизнес хийж, баяжих боломжтой гэж тэрбээр нэмж хэлжээ.

Оросын арми 2022 оны хоёрдугаар сард Украинд халдан довтолсноор эхэлсэн уг дайныг зогсоох хүсэлтэй байгаагаа илэрхийлэхийг Д.Трамп саяхан Киев, Москвад уриалсан юм.

Өнгөрсөн бямба гарагт ОХУ-ын Ерөнхийлөгч Владимир Путин Улаан өндөгний баярын үеэр богино хугацаанд гал зогсоох тухай мэдэгдсэн боловч "түр эвлэрлийг зөрчсөн" гэж хоёр тал бие биенээ буруутгажээ.

Оросууд их буугаар буудаж, камиказе дрон ашигласан гэж Украины зэвсэгт хүчний Ерөнхий командлагч Александр Сырский мэдэгдсэн бол Украины Ерөнхийлөгч Владимир Зеленский "гал зогсоох тохиролцоог Москва 2000 удаа зөрчсөн" хэмээн буруутгасан байна.

В.Путин ням гарагт болсон Улаан өндөгний баярыг тохиолдуулан 30 цагийн турш гал зогсооно гэж мэдэгдсэн боловч хоёр тал уг тохиролцоог зөрчсөн хэмээн бие биенээ буруутгаж, Украины тал "зөвхөн өөрийгөө хамгаалах зорилгоор хариу цохилтууд өгч байна" гэж мэдэгджээ.

Харин Оросын Батлан ​​хамгаалах яам богино хугацааны эвлэрлийн үеэр Украины довтолгоог “няцаасан” гэж мэдэгдсэн байна. Мөн нисгэгчгүй онгоц, их буугаар буудаж, энгийн иргэдийг хохироож байна гэж Киевийг буруутгажээ.

Э.ХУЛАН