Монгол Улсын Засгийн газрын Тэргүүн шадар сайд, Эдийн засаг, хөгжлийн сайд Лувсаннямын Гантөмөр Монгол Улсын Ерөнхий сайд Лувсаннамсрайн Оюун-Эрдэнийн дэргэдэх Эдийн засгийн хөгжлийн зөвлөлийн хуралдааны үеэр "Монгол Улс Евразийн эдийн засгийн холбоо (ЕАЭЗХ)-той байгуулах худалдааны түр хэлэлцээр нь дэлхийн худалдааны дайны үед Монголын Засгийн газрын хийх гол ажил болоод байна" гэж мэдэгдлээ.

Тэргүүн шадар сайд "ЕАЭЗХ болон Монгол Улсын хооронд худалдааны түр хэлэлцээр байгуулах нь Монгол Улсын Засгийн газрын хийх хамгийн чухал ажил юм. Энэ хэлэлцээрийг "Алсын хараа 2050" улс орны хөгжлийн хөтөлбөрт тусгаж өгсөн.

Дэлхийн худалдааны дайны улмаас тодорхойгүй байдал үүсч, хөрөнгө оруулалт багассан энэ үед ЕАЭЗХ-ны орнуудтай худалдаа хийх нь манай зах зээлийг өргөжүүлэх сайхан боломж юм" гэж хэлэв.

Тэрбээр “Дэлхийн эдийн засгийн өсөлт саарсантай холбоотойгоор Монголын байгалийн баялгийн гол хэрэглэгч БНХАУ-д ч эдийн засгийн өсөлт саарах төлөвтэй байна. Улсын төсвийн орлого уул уурхайн бүтээгдэхүүний экспортоос хамаардаг” хэмээн нэмж хэллээ.

Евроазийн эдийн засгийн дээд зөвлөлийн 2024 оны тавдугаар сарын 8-ны өдрийн хуралдааны үр дүнд Монгол Улстай худалдааны түр хэлэлцээр байгуулах, үүний хүрээнд хязгаарлагдмал нэр төрлийн барааны харилцан худалдаанд ногдуулах татварыг тэглэх, хөнгөлөх шийдвэр гаргажээ.

Эх сурвалж: TASS
Б.ЖАРГАЛ